Laing dako nga illegal butane refilling station sa Siyudad sa Talisay nga gironda niadtong Huwebes sa hapon, Septiyembre 26, gipanag-iya sa usa ka giingong drug lord nga nagbase sa dakbayan.

Tulo ka mga tawo ang nasikop.

Ang repilanan sa butane, matod ni Police Major Orlando Carag, Jr., hepe sa Talisay Police Station, nasuta nila nga gipanag-iya sa usa ka drug lord sa Talisay nga ilang nasikop sayo ning buwana.

Nihangyo hinuon si Conag sa Superbalita Cebu nga pugngan ang ngan kay duna silay follow-up operations.

Ang kapulisan, Talisay Fire Station ug Department of Energy (DOE) nironda sa usa ka compound sa Barangay Lawaan 2.

Ilang naabtan nga nag-refill pa ngadto sa mga butane canister sila si Victor Quilaton, 45, taga Brgy. Basak, Siyudad sa Sugbo; Elmer Salbado, 26; ug Maria Elena Bernabat, 36, lumolupyo sa Lawaan 2.

Miabot sa 53 ka mga tangke sa liquified petroleum gas (LPG) ug moabot sa kapin 100 ka mga butane canister, lakip na mga gamit sa pag-refill og butane, ang mga nasakmit.

Matod ni Carag nga ang ilang pagpangronda resulta usab sa pagpakabana sa publiko nga maoy nihatag kanila og impormasyon.

Kini human nga nanawagan si Talisay City Mayor Gerald Anthony ‘Samsam’ Gullas Jr. sa mga Talisaynon nga manginlabot ug mo-report ngadto sa kapulisan o bisan sa Facebook page sa mayor.

Sa mga nahibaw-an nga balay o estraktura o si bisan kinsa nga namaligya ug nag-refill og mga butane, peligro kaayo kini.

Niadto lang Martes, Septiyembre 24,libuan ka mga butane canister ug gatusan ka mga LPG tank ang niulbo sa usa ka butane refilling station sa Barangay San Roque.

Wa hinuoy nangaangol, apan nakamugna kini og tumang kahadlok sa kasilinganan.

Dugang sa mayor nga dili na niya buot pa nga adunay maangol ug makalas sa laing susama nga insedente hinungdan nga gipatutokan kini karon sa law enforcers.