Hepe sa kapulisan sa dakbayan sa Carcar nanghimakak nga wala tagda sa kapulisan ang alarma nga usa ka ginang nga gikulata sa iyang kapuyo alas 10:45 sa gabii Sabado, Pebrero 11, 2023, sa adlan P. Nellas, Barangay Poblacion 3.

Kini maoy gipadayag ni Police Lt. Col. Ardioleto Cabagnot, hepe sa Carcar City Police Station, dihang nahinabi sa Superbalita Cebu, human dunay gi-post sa social media ang usa ka concerned citizen.

Sumala ni Cabagnot, wala dayon maabot ang tropa sa kapulisan kay ang ilang patrol car gigamit sa pagpatrolya sa ilang personnel sa laing barangay nga nagbantay sa kalingawan sa fiesta.

Apan wala magpasabot nga wala sila moatiman sa biktima ug nirespondi, pasabot sa hepe.

Sumala pa niini nga dili lang unang higayon nga nahitabo ang pagpangulata.

Sa unang reklamo sa biktima, giandam sa Carcar Women’s Police ang kaso pero, ang biktima niatras kay naluoy sa suspek, iyang gipasaylo.

Ang duha pulos suki sa police station sa ilang mga kaguliyang, dugang sa hepe.