IBALHIN og luwas nga dapit ang kapin sa 1,500 ka mga tinun-an sa elementarya ug sekondarya sa Barangay Cantao-an, siyudad sa Naga, habagatang Sugbo human gideklarar nga naa sa kritikal nga lugar ang gibarugan sa ilang mga tunghaan.

Si City of Naga Mayor Valdemar Chiong nibutyag nga duna na silay nakit-an nga luna nga paliton sa City Government aron maoy tukoran sa school buildings nga dunay 60 ka mga lawak saringan alang sa mga estudyante sa high school ug elementarya.

Ang maong luna anaa lang gihapon nahimutang sa Barangay Cantao-an, mga sayis kilometros ang gilay-on gikan sa national highway.

“We just conducted a geologic testing in the area and okay naman kuno. So, we’re proceeding to buying it,” nagkanayon si Chiong dihang nahinabi sa mga tigbalita niadtong Agusto 6, 2019.

Manginahanglan sila og P60 milyones alang sa pagpatukod og 60 ka bag-ong mga lawak saringan.

Apan P30 milyones pa lang ang nagahin sa siyudad alang niini.

Si Gobernador Gwendolyn Garcia nisaad nga mohatag og P3 milyones nga tabang pinansiyal ang kagamhanan sa lalawigan sa Sugbo ngadto sa siyudad sa Naga alang sa pagpatukod sa school building sa Barangay Cantao-an.

“Angayan man nga tabangan gyud to sila. Grabi sad to ang ilang giagian sab no. And I really sympathize with the Naga City Government in what they had to go through and continue (to go through) kay nagtabang pa gud gihapon na sila. Gipangbakwit ang kanang mga naa sa danger zone,” dugang ni Garcia.

Di mominos 78 ka mga tawo ang nangamatay dihang nidahili ang yuta sa Barangay Tina-an, Naga niadtong Septiyembre 20, 2018.

Sigon ni Chiong nga dunay P1 milyon nga gisaad ang miaging administrasyon sa Kapitolyo alang sa mga biktima sa landslide, apan wa mapagawas.

Siya nidugang nga iyang istoryahan si Garcia nga ipagawas ang maong kantidad ug kon mahimo, himuon kini nga P3 milyones. (SCG)