Sulod lang sa nag-unang onse ka mga adlaw sa Oktubre, moabot na sa lima ka mga kaso sa pagpamusil ang natala sa Cebu City Police Office (CCPO).

Nasubay sa kapulisan nga pulos dunay kalambigitan sa ilegal nga drugas ang motibo ug usa niini tungod sa panagkompetensya sa ilegal nga negosyo.

Sumala sa kapulisan, la­bing uwahing kaso nahitabo sa parking area sa Auto Bus sa V. Rama Avenue, Barangay Calamba, dakbayan sa Sugbo sa Miyerkules sa ka­adlawon, Oktubre 11, 2023.

Giila sa mga sakisi ang biktima nga si Adrian Lloyd Al­merez Flores, 32, ulitawo, nagpuyo sa C. Padilla, Barangay Duljo Fatima.

Duna nay suspek ang kapulisan apan nagpadayon pa ang ilang manhunt atol ning pagsuwat.

Sa Oktubre 10, gipusil ang usa ka babaye sa Sitio Alomnus Asophuwa, Barangay Basak San Nicolas nga giila nga si Jan Niña Delos Santos Lacumba, 24, ug molupyo sa naasoy nga lugar.

Siya giingon nga naalaang asset ug gibasol sa anti-drug operations sa ilang lugar.

Niadtong Oktubre 6, gipusil-patay si Jonathan Plarisan Nacional, 32, sa V. Rama Avenue, Barangay Calamba, pasado alas 9:00 sa gabii diin ang suspek giingong karibal niini sa negosyo sa drugas, subay sa pasiunang pakisusi sa kapulisan.

Niadtong Oktubre 4, gipusil-patay si Herman Panugan sa Sitio Alaska Barangay Mambaling ug lain pang usa nga gitipi nga gitumbok sa kapulisan nga tungod usab sa ilegal nga drugas.

SEPTIYEMBRE

Matod ni Police Lieutenant Colonel Albert Quilitorio, hepe sa Police Community Relation sa CCPO, nga niadtong Septiyembre, dunay 11 ka mga kaso sa pusil ang ilang natala.

Ang unom sa mga suspek nasikop, tulo ang gipasakaan na og kaso sa korte bisan wala pa madakpi ug duha ang ubos paa imbestigasyon.

Ang mga anggulo nga migawas sa imbestigasyon sa tanang kaso pulos nagtumbok sa ilegal nga drugas, panag-atbang sa ilegal nga negosyo ug personal nga atraso sa drugas.

POLICE VISIBILITY

Bisan pa niini, si Quilitorio nagkanayon nga luwas pa gihapon ug malinawon ang kinatibuk-an sa dakbayan sa Sugbo.

Samtang, si Police Colonel Ireneo Dalogdog, hepe sa CCPO, nimando sa tanang station commanders nga mas palambuon ug hingusgan pa ang police visibility lukop sa dakbayan aron pagsumpo sa kriminalidad.