Nisugyot ang Cebu City Police Office sa Konseho sa Dakbayan sa Sugbo sa pagpalabang og ordinansa nga maghimong rekisito sa barangay clearance sa mga moabang og balay ug boarding house.

Ang ilang hangyo ilang gipaagi kang Konsehal Philip Zafra, tsirman sa Peace and Order Council sa Siyudad.

Kadtong buot mopuyo gikan sa laing dapit, kinahanglan makig-alayon sa barangay officials una pa sila makapuyo.

Kinahanglan nga ang nagpaabang o kadtong mga landlady/lords gikinahanglan nga mangayo og records aron sila ang mohatag ngadto sa barangay.

“Kon dili gani mohatag og record ang kadtong moabang, dili nila paabangon,” matod ni Police Lieutenant Colonel Wilbert Parilla, deputy city director for administration sa CCPO.

Nipasabot si Parilla nga kini makatabang og dako dili lang sa kapulisan, lakip na usab sa mga barangay nga dunay mga bag-ong salta aron ang tanang mga tawo nga mosulod sa ilang jurisdiction dunay record ang buhatan.

“Aron ang tanang lumolupyo to include students, trabahante nga nagpuyo sa atong siyudad ato sad nga mamonitor ug makabalo ta kon pila na usab ang aktwal nga nagpuyo sa atong barangay,” dugang ni Parilla.

Matud ni Parilla nga duna nay mga barangay nga iyang nahimamat ug nakasulti sila niini nga duna silay ordinansa sa ilang barangay sa dili pagtugot sa bag-ong mga salta nga mopuyo sa kadtong nagpaabang kon walay clearance gikan kanila.

Gawas sa pagpalig-on sa pagsumpo sa kriminalidad ug ilegal nga kalihukan sa usa ka tawo nga mobalhin og balay, usa usab kini ka pamaagi sa paglig-on sa panagtambayayong sa kapulisan ug barangay.

Dugang ni Parilla nga samtang nagpaabot pa sila sa maong ordinansa, ila na kining ihatag nga direktiba sa tanang mga chief of police sa 13 ka mga estasyon sa kapulisan nga sakop sa CCPO.

“Atong pahimangno sa atong mga chief of police to coordinate sa ilang respective barangay aron ilaha nang i-replicate sa ilang barangay para duna silay monitoring ilabi na nga duna tay mga police sa barangay nga mokuyog sa atong mga barangay tanod,” matod niya.

Usa na niini ang nahimong ehemplo sa nadakpan nga tulo ka mga tawo sa Barangay Bacayan nga mga nag-abang lang og balay.

Nakugang ang mga silingan niini lakip na ang ningsaksi nga konsehal atol sa dakop sa nasakmit nga binultong drugas.