Si Cebu City Health Department Head, Dr. Jeffrey Ibones nipahibawo nga ang mga tawo nga hingpit nang nabakunahan unom ka buwan na ang milabay mahimo nang maka-avail sa booster shot sugod sa Lunes, Nobiyembre 29 hangtod sa Miyerkules, Disyembre 1, 2021.

Hinuon, kadto lang nabakunahan sa dakbayan sa Sugbo ang ilang atimanon.

Gibutyag ni Ibones atol sa pakighinabi sa mga tigbalita nga ilang bakunahan mao ang naa sa kategoriya ubos sa grupo nga A1, A2 ug A3 sa pagkakaron.

Ang A1 naglangkob sa mga healthcare worker samtang ang A2 naglangkob sa senior citizens ug A3 ang mga tawo nga adunay comorbidity.

Ang kinahanglan buhaton sa magpabakuna mao ang pagparehistro ug ipahibawo kon unsa ang ganahan nilang brand ug hingpit na ba silang nabakunahan unom ka buwan o mas dugay sa di pa ihatag ang booster shot.

Apan way labot niini kadtong igo rang naka first dose.

Ang mga booster shot ipanghatag lang sa fixed vaccination sites sa pagkakaron, dili sa pop-up vaccination nga mga dapit tungod kay ang naulahi estrikto sa una ug ikaduhang vaccine doses sa pagkakaron.

“Pwede magparehistro ang mga tawo sa www.pabakunata.com, aduna silay options nga kapilian ug kadtong ubos sa A1, A2 ug A3 kinahanglang makakuha sa boosters gikan sa Nobyembre 29 hangtod Disyembre 1,” matod ni Ibones.