NAGHUWAT pa si Lapu-Lapu City Mayor Junard Chan sa tubag sa Maritime Industry Authority (Marina) 7 kalabot sa iyang hangyo nga dili una wagtangon ang mga kahoy nga motorbanca sa dakbayan sa pagkakaron.

Sa iyang suwat sa Marina-7, gipadayag sa mayor ang mga konsiderasyon nga angayang ihatag sa Marina 7 sa operators kon ugaling desidido sila nga wagtangon na ang mga kahoyng motorbanca.

Una nga hangyo ni Chan sa Marina-7 mao nga unta adunay financial assistance program alang sa mga tag-iya og motorbanca o operators nga hatagan sa ilang transisyon sa fiberglass motorbanca gikan sa kahoy.

Ikaduha, hatagan og igong lugway o hinayhinayan lang una ang pagwagtang sa mga kahoy nga motorbanca aron dili maapektohan ang turismo sa dakbayan.

Ikatulo, hatagan og konsiderasyon sa Marina-7 ang operators nga ma-renew ang ilang Certificate of Public Convenience (CPC) permit aron makapadayon sa ilang panginabuhi. (GCM)