GIPA-ABLIHAN na sa Cebu City Government ang mga dalan ug giwagtang na sab ang border checkpoint sa mga utlanan sa Mandaue City ug Talisay City, ilabi na sa South Road Properties, kagahapon, Agusto 4, 2020.

Si Mayor Edgardo Labella misanong sa rekomendasyon ni Alma Barandog-Casimero, pangulo sa Cebu City Transportation Office (CCTO), nga hamugaway nang makaagi ang sakyanan gikan sa Talisay paingon sa Cebu City ug Mandaue.

Lahos-lahos na sab nga makaagi ang mga sakyanan gikan sa Mandaue nga mosubay sa Serging Osmeña Avenue sa North Reclamation Area.

Gibuksan na ang General Maxilom Extension duol sa Robinson Galleria ug gitugotan na sa pag-right turn ug left turn ang mga sakyanan sa maong dalan.

Abli na usab ang dalan V. Sotto paingon ug gikan sa Pier 3 nga usa sa mga kritikal area gumikan sa kadaghan sa mga sakyanan.

Gipadayag ni Casimero nga naghuwat pa sila og dugang rekomendasyon sa Philippine National Police kinsa maoy ilang kaabag sa border checkpoints alang sa pag-abli og dugang kalsada.

Nagpabilin pa nga gisira ang N. Bacalso habig sa Barangay Bulacao sa south district, Katipunan sa Barangay Labangon, ug ang one-way entrance sa Barangay Guadalupe nga maoy hinungdan sa pagtapok sa sakyanan sa midtown area. (PAC)