BISAN ang Malacañang nipaklaro nga ang police operations batok sa mga tambay mao lang ang pagpatuman sa local ordinances, apan ang Commission on Human Rights (CHR) niawhag sa kapulisan sa pagpatuman sa balaud nga walay paglapas sa tawhanong katungod.

Si Atty. Arvin Odron, director sa CHR 7, niasoy sa SunStar Cebu nga samtang ang Malacañang nipaklaro sa papel sa PNP’s Anti-Tambay campaign, siya naglaum nga ang kapulisan mohimo sa matarong nga pagsikop sa mga estambay nga enosente nga nihimo sa ilang katungod sa paglihok.

Matod ni Odron, gawas sa lokal nga kapulisan, siya niawhag usab sa mga lokal nga kagamhanan sa pagduso og ordinansa nga dili makalapas sa katungod sa uban.

Si Odron niingon nga mayoriya sa LGUs sa Cebu matawag nga “human rights compliant,” apan dunay uban nga mopatuman sa polisiya nga alang sa kaayohan apan nakaapekto usab sa katungod sa uban.

Iyang gitumbok ang 'shame campaigns sa mga Barangay Pajo sa Lapu-Lapu City ug Ermita sa Cebu City. (SunStar Cebu)