Mingaw ang Pasko sa dakbayan sa Mandaue kay idili sa lokal nga kagamhanan ang pagpahigayon og Christmas party ug ang caroling o panaygon.

Gikasabotan na sa Emergency Operation Center (EOC) sa Mandaue City ug lokal nga Inter-Agency Task Force ang pagdili sa party ug panaygon tungod sa padayong hulga sa coronavirus disease (Covid-19).

Sa pakighinabi sa Superbalita Cebu kang Atty. John Eddu Ibañez, executive secretary ni Mandaue City Mayor Jonas Cortes, ang mayor mopagawas og executive order alang niini.

Matod ni Ibañez, way gitugot nga mga Christmas gatherings sa Dakbayan sa Mandaue, sa balay o opisina ug uban pa labi na kon molapas og 10 ka tawo.

Mosugot lang ang Dakbayan kon tambungan lang sa pamilya nga nagpuyo sa usa ka balay o compound, matod ni Ibañez.

Daghan sab ang mi-request nga magpahigayon og federation meeting, Christmas party ug uban pang panagtapok apan wala kini giaprobahan sa Dakbayan, matod ni Ibañez.

MAGBANTAY LANG

Apan alang kang Steven Yu, presidente sa Mandaue City Chamber of Commerce and Industry (MCCI), mas uyon siya kon itugot sa dakbayan ang gatherings.

Sa tan-aw ni Yu, panahon na nga hinay-hinay na sab nga mobalik ang mga social activities basta motuman lang sa health protocol.

Bisan paman, giawhag gihapon ni Yu ang tanang negosyante sa Dakbayan sa Mandaue nga motuman sa tanang direktiba sa lokal nga kagamhanan labi na kon alang kini sa kaluwasan sa katawhan.

Matod ni Ibañez nga ang magpahigayon gihapon og Christman party bisan sa maong kamandoan, badlungon sa barangay officials o kapulisan ug ipahunong. Human niini, tanang ningtambong sa maong panagtapok ipaubos sa contact tracing.

Giawhag ni Ibañez ang tanang Mandauehanon nga kon aduna silay nahibaw-an nga nagpahigayon og Christmas party i-report sa awtoridad.

Sa laing bahin, gidili sab sa dakbayan ang mga manaygon bisan mao kini ang naandan sa ubang mga indibidwal. Gipasabot ni Ibañez nga basin na hinuon nga mao kini hinungdan nga magtakod takod ug mosaka balik ang kaso sa Covid-19.

Aron matuman ang maong mando, matod ni Ibañez nga gitahasan nila ang mga barangay officials ug ang Mandaue City Police Office sa pagbadlong sa mga manaygonay. (KFD)