GIPIRMAHAN na ni Mayor Edgardo Labella ang Christmas bonus sa kapin 5,000 ka mga kawani sa Cebu City Hall Martes, Nobiyembre 19, 2019.

Niabot og P101 milyones ang gigahin ni Labella para sa regular ug casual workers, apil na ang elected officials. Ang pundo gikuha sa savings sa City Hall.

Ang P20,000 posibleng madawat sunod semana depende sa kapaspas sa pag-andam sa payroll. Ang bonus karong tuiga mas dako kon itandi sa 2018. Tag P15,000 lang ang bonus nga nadawat sa miaging tuig sa matag kawani.

Si Konsehal Raymond Garcia, majority floor leader, niingon nga human sa pagpirma ni Labella, ang mga dokumento iduso ngadto sa konseho para sa pagpasar og resolution alang niini. (PAC)