DI talikdan sa Cebu City Government ang mga pampublikong tunghaan kinsa naglisod og bayad sa ilang konsumo sa kuryente matag buwan.

Si Konsehal Joy Augustus Young, chairman sa committee on education, nagkanayon nga makig-alayon siya sa Department of Education-Cebu City aron pangayuan og katin-awan ang mga nagdumala sa public school nganong dagko sila og bill sa kuryente bisan panahon sa summer.

Ang pamahayag sa deputy mayor on education nagsumikad sa nahitabo sa Cebu City National Science High School, nga wa makabayad sa kuryente gumikan sa kakuwang sa budget gikan sa DepEd nga gipaagi sa Maintenance and Other Operating Expenses (MOOE).

Gipasabot ni Young nga sukad wala na nibayad ang City Government sa bayranan sa kuryente sa public school niadtong 2016, nakabaton na kini og mga problema sama sa nahitabo sa Science High.

Di na putlan

Di na angay mabalaka ang 685 ka mga tinun-an sa Science High nga maputlan og kuryente sanglit nagkasabot na ang City Government ug opisyal sa Visayan Electric Company nga makadapayon sila og gamit sa kuryente.

Matod pa ni Young nga abagahon sa City Hall ang bayranan sa kuryente sa maong tunghaan nga maoy labing prestihiyuso sa mga public school apan mangayo siya og katin-awan gikan sa DepEd.

Kini sama pananglit sa giingong P60,000 nga bayranan sa kuryente panahon sa summer diin walay klase.

Gitug-an ni Young nga mahimo silang magkuha og pundo sa local school board para ibayad sa kuryente.

Samtang, hatagan og hangtod Hunyo 29 sa Visayan Electric Company ang tunghaan nga mabayran ang unpaid balance niini nga P544,549.69 human ni pirma na kini og kasabutan kagahapon sa ilang buhatan.

Ang unpaid balance sulod diay sa lima ka buwan ug matod pa sa Veco nga sige na ang ilang pagbisita sa tunghaan aron pahinumduman sa ilang bayrunon.

Samtang ang CCNSHS Alumni Foundation, nihangyo na usab sa kagamhanan sa dakbayan sa Sugbo pinaagi sa pagpadala niini og suwat aron tabangan ang tunghaan sa bayrunon niini. (PAC, HBL)