Unang adlaw sa pagpatuman sa Commision on Elections (Comelec) checkpoints sa Central Visayas (CV) niadtong Dominggo, Enero 9, gihulagway nga hapsay ug malinawon.

Dungan nga milusad sa ilang checkpoints ang kapulisan sa CV atol sa pagsugod sa election period sa naasoy nga adlaw, gikan sa alas 12:01 sa kaadlawon hangtod sa alas 6:00 sa buntag.

Matod ni Police Brigadier General Roque Eduardo Vega, hepe sa Police Regional Office (PRO) 7, walay bisan usa ka insidente nga nahitabo sa unom ka oras nga Comelec checkpoints.

Iyang gipasalamatan ang kooperasyon sa publiko sa maong dakong kalihukan diin uban nila ang mga opisyal sa Comelec ug mga representante niini.

Mando ni Vega sa iyang mga unit commander nga mag mabinantayon ning panahon aron mapugngan ang mga kalihukan sa mga criminal nga mohimog kasamok ning nagkaduol na ang eleksyon.

Ang PRO7 hugot na nga nag-monitor sa mga kalihukan sa eleksyon pinaagi sa Regional Election Monitoring Action Center (REMAC-7) sa sulod sa PRO7 headquarters.

Si Police Lieutenant Colonel Wilbert Parilla, deputy city director for operation sa Cebu City Police Office (CCPO), sa iyang bahin nagkanayon nga hapsay ug malinawon usab ang ilang gilusad nga checkpoints nga walay bisan usa nga nadakpan nga nakalapas sa gun ban.

Kini nagpasabot nga nasayod na ang publiko labot sa balaod nga hugot nga gidili ang pagdalag mga armas ning panahon sa election sanglit gi kanselar man ang permit sa paghupot og armas sugod Enero 9 hangtod sa Hunyo 8, 2022.

Gidugang ni Parilla nga ang tanang lagda sa husto nga pagpatuman sa checkpoint ilang gituman sama sa pagpahigayon niini sa hayag nga lugar nga makita sa mga motorista ang karatola nga Comelec checkpoint.

Gipahimangnoan usab ang mga police nga kinahanglan with courtesy ang pagpara sa mga motorista nga maoy mando ni PNP Chief Police General Dionardo Carlos.

Nipasabot si Parilla nganong mga naka-motorsiklo lang ang ilang parahon aron susihon kon aduna ba silay dala nga armas tungod kay ang mga kriminal kasagaran motorsiklo ang gamiton.

Wala kini magpasabot nga gi discriminate nila ang mga naka-motor, sigun ni Parilla.

Gawas kon aduna silay impormasyon nga gisakay og sa auto o kaha sakyanan ang mga armas diha na sila mo para sa tanang mga sakyanan aron usab dili kini maka mugna og kahuot sa dagan sa trapiko.

“Usually man gud makita nato walay four wheels nga maoy gigamit sa mga criminals...” matod ni Parilla.

Awhag sa kapulisan sa publiko nga motuman sa mando sa mga pulis nga nag-checkpoint aron dili maka sugat og problema tali sa mga awtoridad.

Kon adunay masakpan nga magdala og armas mag atubang kini og patong patong nga mga kaso ngadto sa korte.