ESTRIKTO nga ipatuman ni Mayor Edgardo Labella ang provision sa Urban Development and Housing Act (UDHA) nga magkolekta og porsiyento sa mga developer og condominium ug subdivision sa Dakbayan sa Sugbo.

Si Labella nagkanayon nga adunay gilatid sa balaod nga nagmando sa mga land developer paghatag og 5 porsiyento nga bahin sa Local Government Unit para pagtukod og condominium ug laing 20 porsiyento para sa subdivision.

“Kon gi-implement unta na religiously, ang 5 percent for condominium and 20 percent for subdivision, tingali nahatagan na og mga puy anan ang tanang mga homeless ug underprivileged family and we have to do it now rather than later,” padayag ni Labella.

Gipahibawo kini ni Labella atol sa ground breaking sa medium rise building (MRB) para sa mga homeless ug underprivileged sa Barangay Lorega San Miguel nga mobalor og P230 milyones.

Ang edepisyo mobarog sa 1,800-square meter nga luna diin maatiman ang 200 ka mga pamilya sa lima ka andana nga MRB.

Ang mayor nagkanayon nga kon makolekta sa Siyudad ang bahin gikan sa developer para sa socialized housing, ang tanang lumolupyo makabaton na og pinuy-anan. (PAC)