ANG aktibong mga kaso sa Covid-19 sa Dakbayan sa Sugbo ubos na sa 1,000 kay 958 na lang ang kinatibuk-an base sa data sa Emergency Operations Center sa Septiyembre 24, 2021.

“It’s a very good day for Cebu City. We breached sub-1 thousand active case and below the WHO 5 percent daily positivity rate,” matod ni Cebu City EOC deputy chief implementer Konsehal Joel Garganera sa Sabado, Septiyembre 25.

Matod ni Garganera nga sa 1,004 ka samples gikan sa Cebu City nga gi-test alang sa Sars-CoV-2, kagaw nga nagdala sa Covid-19, sa Biyernes, 45 lang ang nagpositibo sa test.

Kini nagdala sa daily positivity rate sa Siyudad ngadto sa 4.48 percent, nga nasulod sa five percent threshold sa World Health Organization nga porsyento sa positive sa gihimong Covid-19 tests.

Ang Covid-19 critical care occupancy usab sa Siyudad nasulod sa 60 porsyento nga safe zone kay naa lang kini sa 44.2 porsyento sa Huwebes, Septiyembre 23.

Sa 943 ka Covid beds nga gigahin sa 15 ka mga tambalanan sa Siyudad sa Sugbo, 417 lang ang okupado.

Sa bakanteng mga katre sa Covid, 357 ang naa sa pribadong mga tamblanan ug 169 ang naa sa upat ka publikong mga tambalanan sa Siyudad.

Matod ni Garganera nga ang Siyudad duna nay 270, 816 ka fully vaccinated nga mga tawo o 40 porsyento sa target nilang eligible nga bakunahan alang sa anti Covid vaccines.

Matod niya nga 336, 204 (49.53 porsyento ang nakadawat na sa unang dose sa duha ka doses sa Covid-19. (WBS)