GIRONDA sa mga sakop sa Women and Children Protection Center Visayas Field Office ang giabangang condo unit sa usa ka 63 anyos nga American national sa General Maxilom avenue, Barangay Cogon Ramos, siyudad sa Sugbo pasado alas 5 sa Biyernes sa hapon, Mayo 31.

Ang langyaw giingong makig-sex samtang magkuhag hulagway.

Ang mga operatiba sa WCPC armadog search warrant nga giluwatan ni Judge Ramon Daomilas Jr, presiding judge sa Regional Trial Court (RTC) 7 Branch 11 sa Siyudad sa Sugbo batok kang Craig Alex Levin, 63, lumad nga taga Coates Lane King of Prussia, Pennsylvania, Estados Unidos.

Kanunay mag-anhian sa Pilipinas si Levin ug mopuyo kinig mga condominium ug sulod sa usa ka buwan mobalik na usab sa America.

Una siyang nadakpan niadtong Mayo 24 sa alas 5 sa hapon human siya magdalag usa ka babayeng menor de edad sa lobby sa condominium.

Matod ni Police Captain Niño Lawrence Ibo, deputy chief sa WCPC Visayas Field Unit, nga naabot si Levin sa Sugbo niadtong Mayo 8.

Pagka Mayo 20 nakadawat silag referral gikan sa Federal Bureau of Investigation (FBI) labot sa ilegal nga kalihukan sa langyaw.

Ila dayon kini nga gipaubos sa surveillance ug nasuta nga kanunay kini nga magdalag babaye sulod sa iyang condo unit nga giabangan.

Pagka Mayo 24, ila dayon kining gidakop tungod sa kalapasan sa Republic Act 7610 kun Child Abuse Law ug RA 10364 kun Qualified Human Trafficking Act.

“Na monitor namo ni gikan sa FBI nga referral nga everytime moari siya sa Philippines, iyang mga contact ani is mga minor,” matod ni Ibo.

Ilang giimbestigar ang mga babaying biktima ni Levin.

Sila ningtug-an nga dalhon niya sa iyang kwarto sa laing condo unit ug makighilawas kini ug kuhaan niyag hulagway.

Gituohan usab nga magkuhag video samtang makig-sex, apan sutaon pa kini sa kapulisan.

Tungod sa impormasyon, nagduda ang kapulisan nga naa sa condo unit niini gibilin ang hubo nga mga hulagway sa mga menor de edad nga mga babaye. Ning-apply silag search warrant sa korte.

Sa sulod sa condo nakita ang daghang mga credit cards sa langyaw ug mga condom lakip na ang usa ka posas nga gituohan nga gigamit sa iyang pagpakighilawas sa mga biktima.

Lakip sa nakuha ang mga sapot sama sa underwear sa mga bata nga matod niya iyang igasa sa anak sa iyang higala.

Nakuha usab ang usa ka Iphone ug MacBook nga ipaubos pa nila sa forensic examination sa Anti Cyber-Crime Group 7.

“There is no illegal here. No drugs. The clothes? That’s for my friend. I don’t know what they are doing,” matod ni Levin.

Nakakuha usab silag usa ka notebook nga adunay mga ngalan sa mga babaye nga aduna pay nakabutang nga edad ug pila ang iyang nahatag mga kwarta.