Giangkon ni Metropolitan Cebu Water District (MCWD) chairman Jose Daluz III nga personal siyang pabor sa nominasyon ni kanhi city administrator Floro Casas nga mahimong bag-ong assistant general manager sa government-owned utility provider.

Sa pakighinabi sa SunStar Cebu sa Miyerkules, Septiyembre 7, 2022, si Daluz niingon nga bisan pa sa iyang gusto kang Casas, ang desisyon nagpabilin sa general manager ug sa tibuok MCWD board of directors.

Gihimakak usab ni Daluz ang mga pasangil sa MCWD Employee’s Union (MEU) nga nanghilabot siya sa proseso sa pagpili aron lang ma-accommodate ang pagsulod ni Casas sa water district.

Si Casas, kinsa nagsilbi nga city administrator ni anhing Cebu City mayor Edgardo Labella, suod nga higala ni Daluz.

Gani si Casas maoy tsirman sa Partido Panaghiusa, diin si Daluz maoy presidente karon ug usa sa mga founder.

Gipasabot ni Daluz nga ang pagkalakip ni Casas sa listahan sa mga nominado miagi sa saktong pamaagi ug bag-o lang silang gipahibawo sa posibleng pagsulod ni Casas.

“Ako, I have been clear that I am preferring Atty Casas. I will not deny that but I am not the only one who (will) approve it,” ni Daluz.