Sugod karon, Enero 24, ang tanang porma sa klase, limited face-to-face o modular blended learning, sa tanang tunghaan ubos sa Department of Education sa Central Visayas (DepEd 7) suspendido.

Si DepEd 7 Director Salustiano Jimenez niisyu og memorandum nga pinetsahan og Enero 20, bahin sa pagpahibalo sa pagsuspenso sa mga klase tungod sa pagpaubos sa rehiyon sa quarantine status nga Alert Level 3 gikan niadtong Enero 14 ngadto sa 31, gawas lang sa Siquijor.

Si Jimenez nibutyag sa SunStar Cebu nga ang maong lakang tungod sa nagkataas nga kaso sa coronavirus disease disease (Covid-19) lakip sa epekto sa bagyong Odette niadtong Disyembre 16, 2021.

“All synchronous and asynchronous classes shall be put on hold while submission of academic requirements and conduct of other teaching-related activities must be moved to a later date. For late submission of requirements, accommodations must be afforded for those with valid reasons,” tipik sa memorandum ni Jimenez ngadto sa tanang school division superintendents, assistant superintendents ug uban pa.

Apan gipahinumdoman ni Jimenez ang mga tagdumala sa tunghaan nga mohimo og adjustments sa school calendar sa pagseguro nga makuha ang sakto panahon sa klase nga moabot ngadto sa kapin sa 220 ka mga adlaw.

Samtang, si Jimenez nagkanayon nga ang mga pribadong tunghaan mohimo og ilang kaugalingong hukom sa pagsuspenso sa klase ug mga kalihokan apan kinahanglan nga mokonsulta sa parent’s association.

“Private schools, in consultation with their respective parents’ associations, may exercise their own discretion relative to the suspension of classes and K to 12 learning activities when COVID-19 risks in their respective areas are high,’’ matod ni Jimenez.

Apan si Jimenez sa sayo pa nimando sa suspensiyon sa klase sa 19 ka school divisions ubos sa koordinasyon sa LGUs alang sa situation-location-based approach.