ANDAM na ang mga pampublikong tunghaan lukop probinsiya sa Sugbo sa pagbalik-eskwela sa mga tinun-an sugod karong Lunes, Hunyo 13.

Ubos sa Cebu Schools Division, dunay 1,809 ka mga tunghaan alang usab sa 567,932 ka mga tinun-an gikan sa 44 ka mga lungsod.

Ang component cities sa lalawigan dunay kaugalingon nilang dibisyon.

Subling gipahinumduman ni Cebu Schools Division Superintendent Dr. Rhea Mar Angtud, ang mga ginikanan ug mga tinun-an sa dili na pagpalta sa pagtunga sa unang adlaw o unang semana sa klase.

Kini tungod, kay matod niya, magsugod na dayon sa leksiyon ang mga magtutudlo ug dili na sama kaniadto nga mao pay pagpahimutang o pagpanglimpyo.

Sa nasayran, gihimo ang pagpanglimpyo ug pag-andam sa mga classroom ingun man ang enrolment sa mga grade 1 ug grade 7 atol sa Brigada Eskwela sa miaging semana nga giapilan sa tanang stakeholders sa edukasyon.

“Atong gi-awhag atong mga ginikanan nga (pa-eskwelahon gyud ang mga bata sa school opening). Di man na pareho kaniadto nga premiro semana manglimpyo so dili ‘sa pa-eskwelahon ang mga bata. Karon magsugod na gyud ang klase,” niingon si Angtud.

Gawas nga dili na manglimpyo, wala na sa’y enrolment nga mahitabo alang sa mga grade 2 hangtud grade 6 ug grade 8 ngadto sa grade 12 sa school opening karong Lunes, sanglit pre-enrolled na sila human makatungha na sa milabay nga mga tuig.

Sigun ni Angtud, ang sectioning na lang sa mga tinun-an maoy suta-on sa mga bata o mga ginikanan sa unang adlaw sa klase.

Hinuon, kadtong mga transferee gikan sa laing skwelahan mahimo nga karong Lunes o sa unang semana pa sa klase mo-enrol sa tunghaan nga ilang balhinan. (AZLG)