POLICE Regional Office 7 (PRO) 7 nipadalag suwat sa pipila ka mga pamilya nga nagpuyo sa luna nga gipanag-iya sa Philippine National Police (PNP) nga nahimutang sa PC Hills, Barangay Apas, Siyudad sa Sugbo aron ipahibawo nga gamiton na kini.

Matod ni Police Brigadier General Albert Ignatius Ferro, direktor sa PRO 7, nga kadaghanan kanila dili sakop sa PNP o sundawo. Kasagaran kanila gihimong negosyo ang luna pinaagi sa pagpatukod og balay aron paabangan.

Gipasalig hinuon ni Ferro nga ang ma-apektohan nga residente pangitaan nilag kabalhinan sulod sa tulo ka mga buwan gikan karon kini tungod sa nasinating pandemic.

Dugang ni Ferro nga ang kabahin nga luna sa PC Hills tukuran og building nga himuong quarters sa mga aktibo pa sa serbisyo nga mga pulis nga nagpuyo sa mga di nila gipanag iya nga luna, lakip na ang pahuwayanan sa mga pulis gikan sa laing probinsya kon adunay tuyo sa siyudad sa Sugbo.

Nakita sa heneral ang kalisod sa mga pulis nga gikan sa Bohol, Negros Oriental ug Siquijor nga mag follow up sa ilang mga papeles sa PRO 7 nga makagasto og dako tungod sa ilang pag-abang og hotel sa dakbayan sa Sugbo.

“A number of them are not really law enforcer or military personnel who have been staying there. And some are doing business. They are making like boarding house, apartment and those are all for business purposes,” matod ni Ferro.

Malinawon nga nakigsabot si Ferro aron mapasabot ang mga namuyo sa luna nga di sila mahimong mogamit niini tungod kay ang aktibong mga personnel lang ang maka gamit sa maong luna.

Sa lagda sa PRO-7 sa nanglabay na nga katuigan, way sibilyan ang tugotan nga makapuyo sa ilang luna gawas sa mga sundawo. Dugay na kini nga problema diin daghan na ang namuyo nga pamilya nga di sakop sa PNP. (AYB)