APIL sa “supervisory authority” sa mayor ang pagmugna sa Mayor’s Information and Liaison Officer (MILO).

Mao kini ang gibutyag ni Department of the Interior and Local Government (DILG) Cebu City officer-in-charge Ian Kenneth Lucero human si Cebu City Mayor Edgardo Labella nihimo og lakang sa pagbuhat sa Milo.

“That is part of the supervisory authority of the mayor to maintain the supervisor sa tanan nga mga barangays,” segun ni Lucero.

Niingon si Lucero nga parte sa gahom sa mayor nga makahibaw siya sa mga problema sa mga barangay nga wa mahatagi og atensyon.

“Mayor Labella has the authority nga motan-aw unsay mga concerns sa mga barangay ug kon kining mga barangay officials nato, the punong barangay, authority ni mayor na. Power niya nga dapat motan-aw nga dapat tanan actions sa barangay officials are in accordance with the law,” matod ni Lucero.

Gihimo ni Labella ang Milo para motabang sa mga barangay captain sa pagtan-aw sa mga problema sa barangay ug direkta kining ipadayag ngadto sa iyang buhatan.

Apan niani kini og sagol nga reaksyon gikan sa mga kapitan sa barangay.

Ang kapitan sa Barangay Inayawan ug Zapatera, bisan kon gikan sila sa pareho nga partido, managlahi ilang pagtan-aw sa pagkahimo sa Milo.

Si Zapatera Barangay Captain Francisco Benedicto nipadayag sa iyang suporta sa pagkahimo sa Milo ug nisaad hatagan kini niya og luna sa ilang barangay hall.

Matod pa ni Benedicto nga nag-andam na siya og mga trabahuon sa Milo para ipadangat ngadto sa buhatan sa mayor sama sa problema sa koleksyon sa basura, streetlights ug baha.

“I’m happy. I already have a partner in the service. This will serve as a bridge between our barangay and the City Hall. This will open Barangay Zapatera to the City Hall,” suma pa ni Benedicto.

Iya usab giklaro nga siya gihapon ang kapitan sa barangay.

Girespeto sab ni Benedicto ang desisyon sa iyang kaalyado nga si Inayawan Barangay Captain Kirk Bryan Repollo kun diin nipadayag kini nga di siya mouyon sa pagbuhat sa Milo.

Hugot sab si Repollo sa iyang desisyon nga di niya hatagan og luna sa ilang barangay hall ang Milo office.

Si Labella nipasabot nga ang pagporma sa Milo kay dili para sapawan ang mga kapitan sa ilang posisyon.

Iya usab giklaro nga di elected officials ang mga mamahimong Milo.