BISAN pa man sa hulga sa 2019-Novel Coronavirus, mohimo og inspeksyon ang Department of Labor and Employment (Dole) sa mga Philippine Offshore Gaming Operators (POGOs) sa nasod.

Adunay 22 ka mga Labor and Employment Officers (LEOs) ang ipakatap sa Dole 7 alang sa pagbalik pag-usab sa special inspection sa alien-employing establishments aron sa inspection ug legalidad sa mga langyaw nga nanarbaho sa nasod.

Si Labor Secretary Silvestre Bello III, sa iyahang bag-ong mando ubos sa Adminstrative Order No. 46, nimando kini sa regional offices nga mohimo og verification inspection sa mga establisyemento lakip na ang Philippine Offshore Gaming Operators (POGOs) karong buwana hangtod Hunyo 30 karong tuiga.

Sumatotal aduna’y 323 ka LEOs ang gipakatap lukop nasod aron mohimo sa maong inspeksyon. Matod sa tigpamaba sa Dole 7 Luchel Taniza nga andam na ang ilang team nga mosuroy sa mga establisementong dunay langyawng trabahante.

Usa sa ilahang sutaon kon aduna kini’y Alien Employment Permit (AEP) ang langyaw nga nagtrabaho sa nasod.

Aduna’y usa ka regular labor inspector ang kuyog sa matag LEOs nga mobarog isip team leader diin mokuyog kini sa verification inspection.

Lakip sa sutaon sa LEOs kining business permit , Securities and Exchange Commission registration, ug AEP sa kawani nga langyaw. (HBL)