REHAS ang gihimashimas sa usa ka drayber sa tourist van nga gidakop sa mga sakop sa City of Talisay-Traffic Operations and Development Authority (CT-TODA) human kini giingong wa motahod sa mga traffic enforcer nga nidakop kaniya tungod sa paglapas sa balaud sa trapiko.

Matod ni Jonathan Tumulak, pangu sa CT-TODA, nga gidakop si Aquilino Judilla Jr., taga Barangay Pagsabungan, Dakbayan sa Mandaue nga wa motuman sa lagda sa trapiko.

Si Tumulak niingon nga si Judilla diha sa lane alang sa mga sakyanan nga moliko sa wala, apan dihang ni go signal na, si Judilla giingong nidiretso, wa moliko sa may sityo Kalmar, Barangay Lawaan 2, Dakbayan sa Talisay sa Martes sa buntag, Enero 19, 2021.

Busa siya gipara sa mga traffic enforcer ug giisyuhan og citation ticket. Inay hipuson ang citation ticket, giingong iya kining gikumot ug gilabay ngadto sa mga enforcer.

Nisibat unta kini, apan ilang gigukod ug naapsan.

Gidakop siya sa mga traffic enforcer ug gipriso sa jail sa Dakbayan sa Talisay.

Matod ni Tumulak nga ila kining pasakaan og kaso nga direct assault ug disobedience si Judilla.

“Set as example sa ubang badlongon nga drivers. Seryuso ta sa campaign against traffic violator ug dapat nila respituhan ang citation ticket kay it represents the law,” pagpasabot ni Tumulak.