Mapun-an og P31 ang inadlaw nga suholan sa mga kawani sa Central Visayas human giaprobahan sa gipahigayon nga board meeting sa Tripartite Wages and Productivity Board (RTWPB VII) Mayo 24, 2022.

Kini ang gikumpirmar ni Atty. Evita Mendoza-Balane, officer-in-charge (OIC) Board Secretary sa RTWPB human sa gipahigayon nga deliberasyon sa board kon pila ang ipatuman nga usbaw.

Ang mga trabahante sa Metro Cebu (agricultural ug non-agricultural) nga gitawag og class A makadawat na og P435 nga sweldo gikan sa P404, Class B nga kanhi nagdawatan og P366 matag adlaw mahimo na unya kining P397, samtang ang Class C nga adunay P356 matag adlaw mahimo na unya kining P387 inig sugod og patuman sa bag-ong kamanuan.

Ang RTWPB-7 nihatag usab og usbaw nga P500 ngadto sa mga kasambahay sa Central Visayas diin ang mga nagtrabaho sa chartered cities ug first class municipalities mahimo nang P5,500 ang ilang sweldo samtang ang nagtrabaho sa ubang lugar nga adunay P4,500 mahimo na usab kining P5,000.

Si Mendoza-Balane nibutyag nga karong adlawa, ilang iduso ang ilang approved resolution ngadto sa National Wage Productivity Commission (NWPC) kinsa gihatagan sa balaod og 10 ka adlaw sa pag-review.