MASALIGON ang Armadong Kusog sa Nasud nga ilang matapos ang problema sa insurhensya sa hinapos nga bahin sa termino ni Presidente Rodrigo Duterte, kung dili man ila kining mapaubos sa criminal group.

Mao kini ang gipamahayag ni General Jose Faustino Jr., hepe sa AFP, nga nibisita sa Sugbo tungod sa pag bukas sa AFP joint exercises karong tuiga nga himuon sa lalawigan sa Antique, isla sa Panay.

Matod sa heneral, ilang tumong nga tapuson nila ang kasungian sa rebellion sa nasud ug kung dili man ila kining maubos ngadto sa ordinaryong kriminal na lamang.

“We are still very optimistic that we can attain that objective na before the end of the term of our president right now matapos natin itong conflict nato, if we cannot reduce it totally at least we could render it na talagang ano nalang sya insignificant na an ordinary criminal group,” matod ni Faustino Jr.

Dugang sa AFP Chief of Staff nga dako kaayo ug natampo sa pag puhag sa insurhensya sa nasud ang programa sa gobyerno nga End Local Communist Armed Conflict (Elcac) sanglit daghan ang natabangan nga mga masa sa mga dapit nga adunay presensiya sa New People’s Army.

Daghan usab ang mibalik sa sabakan sa gobyerno sa dihang nakita nila ang kaayohan sa tumong sa Elcac diin nahatagan sila og panginabuhian ug nausab ang dagan sa ilang kinabuhi nunot sa maong programa.

Gawas sa abag sa gobiyerno lakip sa milihog ang pribadong sektor aron lang makab-ot ang malungtarong kalinaw sa nasud.

“The insurgency can be solve with whole of the natin approach with all the government instrumentalities, the private sector contributing and of course government agencies and the local chief executives, local government units with everybody cooperating and we have seen it and we have done it we have reduce the threat ng CPP-NPA,” dugang ni Faustino.

Dugang sa heneral nga matag adlaw daghang rebelde ang mikanaog na gikan sa bukid aron motahan sa ilang kaugalingon ilabi na sa Mindanao tungod sa mga programa sa gobyerno nga nakatabang kanila. (AYB)