Taas nga opisyal M.E. Sicat Construction Inc. nagpaabot na lang sa final termination letter sa Cebu City Government aron mapormal na ang pagputol sa P907 milyones nga kontra sa Cebu City Medical Center.

Si Engr. Michael Sicat, presidente sa M.E. Sicat, niingon sa higayon nga ipresentar na sa Contract Termination Review Committee (CTRC) ang ilang rekomendasyon, andam na siyang mopirma uban ni Mayor Michael Rama.

Si Atty. Collin Rosell, secretary to the mayor, niingon nga wala pa mahuman ang due process nga ilang gisunod nga maoy nalatid sa Republic Act 9184 kon Government Procurement and Reform Act.

Matud ni Rosell, sa higayon nga makumpleto na ang tanang rekisitos sa mutual termination, ila dayon kining ipahibawo sa M.E. Sicat aron mapahigayon ang pinirmahay ug makairog na usab ang construction sa CCMC labi na sa ika-8 hangtod sa ika-10 nga andana.

Ang M. E. Sicat nagpadala og suwat niadtong Nobiyembre 15, 2022 nga gi-address ngadto kang Rama nga naghangyo nga ipagawas na ang mutual termination letter para sa labing dali nga panahon ila kining mapirmahan.

Ang presidente sa M.E. Sicat nagkanayon nga nasubo siya sa pagputol sa kontrata sanglit dili na sila ang makatiwas og trabaho sa CCMC, apan iyang gihulagway nga kini ang makaayo sa duha ka habig. (PAC)