Gitugyan na ni Lapu-lapu City Mayor Junard ‘Ahong’ Chan ngadto sa kapulisan sa Dakbayan sa Lapu-lapu kon unsay angayan nilang buhaton kini labot sa 20 ka mga nagpositibo nga fixers sa Land Transportation Office (LTO) sa nahisgutang Siyudad.

Ang City of Lapu-lapu Office of Substance Abuse Prevention (CLOSAP) mipahigayon sa usa ka surprise drug test City Sports Complex niadtong Biyernes sa buntag, Enero 27, 2023 ngadto sa 36 ka fixers sa nahisgutang buhatan ug ang resulta 20 niini ang nagpositibo.

“Ato nang gipiyal sa kapulisan to those who got positive nanay buhaton ang atong mga pulis niana and also ihatag pud nato sa atong CLOSAP nga to those who want to rehabilitate nga mag commumity base, i-encourage nako sila nga magbag-o na sa ilang kaugalingon,” matud ni Chan.

Gipahibawo usab ni Chan nga atol sa surprise drug test, walay nagpositibo nga kawani sa LTO sa Dakbayan sa Lapu-lapu.

Unsay sinugdanan sa pagpahigayon og drug test sa fixers?

Matud ni Chan, nunot kini sa mga reklamo nga nadawat sa mayor bahin sa pagpameke sa mga lisensiya sa fixers hinungdan nga gitahasan niini ang Lapu-lapu City Police Office sa pagpatawag sa fixers sa LTO diin kabahin sa plano ang kalit nga drug test.

Apan wala makauyon niini si LTO 7 Regional Director Victor Caindec ug buot mopaimbestigar sa ‘self-confessed fixers’ nga gitigom sa mayor.

Dason sa direktor, ang ahensiya wala magtugot og fixers.