Mga pasahero sa Sugbo makapahimulos gihapon sa free ride service hangtod sa Hunyo 30, 2021, human ang Land Transportation Franchising and Regulatory Board (LTFRB) 7, sa Huwebes, Hunyo 17, 2021 nibakwi sa ilang sayo nga hukom sa temporaryong paghunong sa programa pipila ka mga semana sa di pa kini tapuson.

“Kining atong service contracting kaya na hangtod sa June 30, dili sa nato putlon. I-continue nato sa 30 (We can continue with our service contracting until June 30),” matod ni LTFRB 7 Regional Director Eduardo Montealto Jr. sa SunStar Cebu.

Matod ni Montealto nga ang hukom sa pagsunod sa orihinal nga schedule sa petsa sa pagtapos sa programa, sugod unta sa Hunyo 16, nakab-ot kay duna na silay kapasidad sa paghuman sa processing sa pagbayad sulod sa usa ka semana o unang semana sa Hulyo.

Ang LTFRB una untang nipahibawo sa temporaryong pag-undang service contracting program aron pagmugna og transition period alang sa payout sa transport operators ug drivers, usa ka tahas nga gibalhin sa central office ngadto sa rehiyonal nga buhatan. / WBS