(UPDATED) Niay good news alang sa mga bakunado nga nagpanikad sa pagsulod sa Bohol.

Si Governor Arthur Yap nipahibawo nga wa na kinahanglana sa mga tawo nga fully vaccinated ang reverse transcription-polymerase chain reaction (RT-PCR) test.

Mao ni ang nasabutan atol sa tigom sa Biyernes, Oktubre 22, tali ni Yap, mga sakop sa Bohol Inter-Agency Task Force ug mga mayor sa lalawigan.

Inay RT-PCR test, ang bakunadong mobiyahe kinahanglan nga mokuha og certificate gikan sa Department of Health (DOH) nga dunay quick response (QR) code nga maoy gamiton aron masusi kon kini tinuod ba o peke ingon man S-Pass gikan sa Deptartment of Information and Communications Technology (DICT).

Makuha ang certificate nga dunay QR code gikan sa https://vaxcert.doh.gov.ph/.

Ang masakpan nga nanggamit og fake nga certification pagasilutan, usa niini ang usa ka buwan nga ban sa pagpasulod sa Bohol.

Samtang kadtong di bakunado ug kadtong nag first dose pa makasulod usab sa Bohol, apan nagkinahanglan og RT-PCR test nga nakuha sulod sa 72 oras sa pagsulod sa Bohol.

Matod ni Yap nga mopagawas siya og executive order alang niini aron mamahimong tamdanan sa gustong mobiyahe.(REV)