Ang lungsod sa Tuburan, Sugbo di lang lunlon kape.

Sa sunod tuig, modalit ang lungsod og mas lapad nga mga kasinatian sa natad sa farm tourism.

Nabantog ang Tuburan nga dunay labing dako nga umahan sa kape nga gibana-banang naa sa 3,000 ka hektarya.

Apan si Bise Mayor Aljun Diamante, sa usa ka press conference ug media tour atol sa International Coffee Day sa Oktubre 1, 2021 nipahibawo nga ang mga turista makapaabot sa daghan pang matanyag nga mga kasinatian sunod tuig sa ilang pagduaw sa lungsod.

Kay wa man silay mga resort nga maanindot itandi sa ubang mga dapit sa Sugbo, nakatutok sila karon sa pagpalambo sa farm-tourism ubos sa paggiya ni Boboi Costas, tourism consultant sa lungsod.

Si Costas, kinsa usa ka international award-winning nga consultant sa natad sa sustainable tourism, lapad kaayo og kasinatian sa pagpalambo sa turismo nga maoy tumong karon sa local government unit (LGU).

Ila nang nasugdan ang seed-to-cup nga kasinatian pinaagi sa pagbisita sa ilang coffee farm sa bukiran sa Barangay Kabangkalan, diin ilang gipakita ang makuti nga proseso sa pagtanom sa kape, pagpili sa mga liso hangtod sa pag-andam niini hangtod sa pag-serve.

Ang farm dunay Robusta ug Arabica nga variety sa kape.

BANGUS

Matod ni Diamante, duna na silay farm sa bangus, kansang mga fry gipatubo sa kadagatan sa Barangay Carmelo, diin matag cage dunay 60,000 ka bangus sulod niini.

Ang dapit nga gibutangan sa mga cage duol sa bukana sa Molobolo Spring nga nagpaagas og 10 milyunes ka litro matag adlaw ngadto sa dagat.

Ang resulta mao ang lamian nga matang sa bangus nga gihulagway nga tam-is og unod.

Matod ni Diamante nga lab-as kaayo kini nga idalit ngadto sa matag turista ug lutuon sa lainlaing paagi.

Usa kini sa idalit unya nga pagkaon sa restaurant sa 360 Peak Resort and Camp Site nga nahimutangan sa kinatumyan sa bukid sa Barangay Kabangkalan.

Ang mountain resort buksan sa sayong bahin sa 2022.

Ang talan-awon gikan sa restaurant maanindot kaayo kay makita ang kabukiran sa Sugbo nga sangkad ang malantaw bisan asa ka molingi.

Malantaw usab ang Tañon Strait ug maanindot magtolda sa gabii kay way makasampong bisan gamay kon buot kang mosud-ong sa kalangitan, gawas sa presko ug bugnaw kaayo nga hangin sa kagabhion.

Ang resort gitaliwad-an usab sa coffee farm sa Tuburan.

Sulod sa mountain resort dunay orange tilapia ug bamboo farm diin naa ang tanang mga variety sa mga kawayan.

Gawas sa tilapia, matilawan usab ang nagkadaiyang mga putahe sa native nga manok nga inay sagulan og tradisyunal nga mga lamas ug utanon, dahon sa kape ug liso ang ilang gigamit sa pagpalami.

Matod ni Diamante nga ang tanang lamiang pagkaon nga ilang gidalit puro organic, way bisan usa ka sagol nga kemikal.

Sa mga mahiligon sa scuba diving, nipahibawo ang bise mayor nga dunay magtukod og dive shop sa usa sa mga baybayon sa lungsod alang niadtong mahiligon niini.

Siya malaumon nga human sa Covid pandemic, mosulbong ang turismo sa lungsod tungod sa talagsaon unya kaayong kasinatian nga matanyag sa LGU sa tanang mga bisita.