GAWAS sa cease and desist order nga gipahamtang sa kompaniya nga nilabay sa ilahang tubig nga kolor puwa nga ni viral sa social media, tulo ka mga balaod ang nakita sa Environment Management Bureau (EMB)-Central Visayas nga nalapas sa GBox Corrugated Packaging.

Lakip sa kalapasan niini mao ang Philippine Clean Air Act, Philippine Clean Water Act, ug ang Toxic Substances and Hazardous and Nuclear Wastes Control Act of 1990.

Ang GBox Corrugated Packaging, nga anaa mahimutang sa Sitio Litmon, Barangay Dumlog, dakbayan sa Talisay, naila kaniadto nga PlayG-Tech Trade International Phil’s and Boxmaster Manufacturing.

Nasayran nga ang maong establisyemento mogama kini og corrugated pads, wooden pallets ug material handling equipment susama sa hand pallet truck ug mopaabang og electric kettle.

Base sa imbestigasyon sa EMB-Central Visayas, nasayran nga ang tubig nga nakit-ang nigawas paingon sa dagat gikan kini sa ilahang inking ug labeling area.

Matod sa tag-iya sa kompaniya nga tubig uwan ang maong tubig ug tungod kay wala sila’y kaugalingon nga drainage system, nagpundo ilahang tubig sa dapit, hinungdan nga ilaha kining gi-pump pagawas sa dagat.

Nasuta usab nga nipuwa kini tungod sa water-based nga tinta niini nga aduna’y sagol nga organic pigments, acrylic resins, alcohol, tubig, ug additives.

Usa kini ka hazardous waste nga kalapasan sa Republic Act 6969, Toxic Substances and Hazardous and Nuclear Wastes Control Act of 1990, hazardous waste number F603.

Tungod kay wala’y wastewater treatment facility ang kompaniya, kalapasan usab kini sa Philippine Clean Water Act.

Aduna’y nasuta usab nga abog ang EMB-Central Visayas sa production equipment niini nga kalapasan sa Philippine Clean Air Act.

Nasuta usab sa EMB-Central Visayas nga nag-operate kini nga wala’y Discharge Permit, Permit to Operate, ug Hazardous Waste Generator Registration.

I-endorse ang kaso niini sa Pollution Adjudication Board ug gipatawag kini alang sa technical conference aron pagtubag sa mga kalapasan niini. (Superbalita Cebu)