GIPASALIG sa nasubliang mayor sa lungsod sa Dumanjug, Efren Guntrano “Gungun” Gica, nga makig-alayon ug mokoopar sa mga programa ug proyekto sa Kapitolyo ubos sa liderato ni governor-elect Gwendolyn Garcia.

Kini bisan pa man sa kasaysayan sa panagribal sa politika ni Gica ug sa igsuon ni Gwen nga si Nelson Garcia, kanhi mayor usab sa Dumanjug.

Kini taliwala usab sa hugot nga pagsuporta ni Gica sa kaatbang ni Garcia sa miaging eleksiyon nga si Bise Gob. Agnes Magpale.

Sila si Magpale ug Gica, dunay certificate of nomination and acceptance (CONA) nga parehong kandidato ubos sa Nationalist Peoples Coalition (NPC).

Matod ni Gica, walay rason nga dili siya mo-kooperar sa mga programa ni Garcia, ilabi na kay mao man kini an glider sa probinsiya, diin sakop ang iyang gipanguluhan nga lungsod.

“If ipatawa ko niya, mayor ko under sa province, of course inig patawag niya namo or naku, ipatawag mi, motuman gyud kay siya man ang governor,”pagpasabot ni Gica.

Dugang niya, nahuman na usab ang eleksiyon ug angayang ipadaplin lang una ang mga isyu sa politika ug mopadayon na sa pagpangalagad sa mga tawo nga maoy nibotar kanila.

“Election is already over. The people have spoken. I will support the governor-elect, Gov. Gwen, and her programs, unsay iyang agenda and advocacies para sa province,” padayag sa mayor sa Superbalita Cebu. (AZLG)