PANGUO sa Cebu Provincial Police Office (CPPO) mihimakak nga gituyo nila pagpusil ang upat ka mga suspek sa pagtulis sa mga tindahan og alahas ug money changer sa J Centre Mall niadtong Sabado sa gabii, Oktubre 19, 2019.

Matod ni Police Col. Roderick Mariano nga kung gituyo pa sa pagpatay ang mga suspek, sila na unta tanan ang wala na gidala sa police station sanglit patyon na kini diretso.

Gani sa dihang napusilan ang tulo sulod sa sakyanan, gidali nila kinig dala sa tambalanan sa dakbayan sa Bogo aron maluwas ang kinabuhi apan gi deklara kini nga dead on arrival.

Tinguha unta nila nga buhi silang tanan aron maka hatag kinig impormasyon labot sa mga kaubanan pa niini, apan sila na ang misukol ug igo lang nga mi depensa ang mga pulis.

Gihangop hinuon nila ang pamahayag sa Commission on Human Rights (CHR) nga mohimo silag imbestigasyon apan sa pagduda niini nga rubout, dili kini makataronganon.

Samtang, nibutyag si Mariano nga nakakuha sila ug CCTV video sa terminal sa dakbayan sa Bogo nga nakita ang tulo ka suspek nga maoy gitudlo nga nag dala sa tinulisan nga alahas ug kwarta.

Matod pa ni Mariano nga nanakay ni silag Ceres bus ala 1 sa kaadlawon niadtong Dominggo, Oktubre 20, ug nagpahatod paingun sa Mandaue.

Pasado alas 3 sa kaadlawon, naabot matod pa sa Mandaue ang tulo ug wala na sila masayod asa na kini paingun.

Nakig-alayon na si Mariano sa Mandaue City Police Office (MCPO) aron masusi ang mga CCTV sa maong dakbayan nga gikanaogan sa mga suspek aron masubay asa kini mipaingon.

Usa sa maong suspek gituohan nga maoy leader sa organisadong grupo nga nag base sa Ozamis nga gitawag nilag Parojinog Robbery group.(Superbalita Cebu)