VILLABA, Leyte--Gikompirmar ni Villaba Leyte Municipal Administrator Teddy Vapor nga usa ka locally stranded individual (LSI) ang gilugos sa usa ka gwardya sa quarantine facility.

Base sa press release sa Villaba Police Station, ang suspek giila nga si Ronnie Condes, 49, dunay live-in partner ug job order nga kawani sa lungsod.

Ang babaye usa ka 44 anyos, minyo, gitago sa ngan nga Janice.

Si Janice gikan sa Cebu ug nipauli sa Villaba, apan wa dayon makalahos sa panimalay kay patakaran sa lungsod nga i-quarantine.

Ang quarantine facility nahimutang sa Cayangian, Barangay Tinghub, Villaba.

Matod ni Vapor, base sa sumbong ni Janice, nga makaduha ka higayon na siya gihilabtan ni Condes sud sa lawak niini.

Wa siya makapalag kay gitionan siya og armas .

Dugang pa sa report sa kapulisan, gihulga ni Condes si Janice nga patyon kon ugaling mosumbong ni bisan kinsa.

Si Mayor Jorge Veloso nakadawat sa sumbong, dali nga nimando og manhunt operation batok kang Condes, kinsa nadakpan dayon sa kapulisan.

Matod sa mayor, di niya itugot nga dunay kawani sa kagamhaman o tigpaluyo sa pulitika nga mohimo sa pagpangabuso.

Nag-atubang sa police station sila si Condes ug Janice ug hugot nga misaysay ang ginang sa krimen ngadto sa kapulisan.

Dugang ni Vapor, interesado nga mopasaka og kaso si Janice batok kang Condes.

Si Police Captain Ricky Rubillos, hepe sa Villaba Police Station, nagpasalamat kang Janice sa way pagduha-duha pagsumbong aron wa nay laing mabiktima.

Matod ni Rubillos, andam sila sa pagtabang kang Janice aron pagkab-ot sa hustisya.

Naa na karon sa kustodiya sa kapulisan ang suspek. (JKDP)