Drayber sa usa ka motorsiklo nga nakasaghid sa usa ka batang babaye sa bahin sa Transcentral Highway (TCH) sa Barangay Pung-ol Sibugay, bukirang barangay sa dakbayan sa Sugbo, ug pamilya sa biktima nagkasinabot ra.

Di sab tinuod nga ni hit and run ang drayber sa motorsiklo, matud sa kapulisan, kay nitahan kini sa ilang buhatan human sa hitabo kay nahadlok nga dapatan siya sa mga tawo sa dapit.

Si Police Major Caesar Acompañado, hepe sa Malobog Sub Police Precinct nga nahibabi sa Superbalita Cebu, nibutyag nga ang insidente nasulbad na ug nagkasinabot na ang matag habig.

Matud ni Acompañado nga ang bata wa maligsi, kon di nasaghiran sa motorsiklo dihang nitabok sa karsada.

Dugang niya nga ang drayber, kinsang ngan gipugngan ning mantalaan kay di man siya pasakaan og kaso, milahos sa Mabolo Police Station aron motahan sa kaugalingon samtang sila gipahibawo dayon.

Ang drayber sa motorsiklo maoy niabaga sa mga tambal sa bata hinungdan nga ang pamilya niuyon ra.

Niawhag si Acompañado sa mga ginikanan nga nanimuyo sa daplin sa TCH nga bantayan nila kanunay ang ilang mga anak aron dili madisgrasya.

Ngadto sa mga rider, kinahanglan nga magmatngon usab sa ilang pagmaneho aron malikayan ang disgrasya.