Nabalda ang pag-aspalto sa mga karsada paingon sa venue sa Sinulog Festival sa South Road Properties (SRP) tungod sa panahon, apan usa ka opisyal sa dakbayan sa Sugbo nipasalig nga ang tanang pagpangandam anaa sa eskedyul.

Si Konsehal Jerry Guardo, tsirman sa committee on infrastructure, nitug-an sa mga tigbalita Dominggo, Enero 8, 2023, nga 85 porsiyento na nga nahuman ang pag-aspalto sa mga pavement sa kadalanan apan kinahanglang hunongon ang pagtrabaho tungod sa pagsige og ulan.

Bisan pa sa ulan, si Guardo niingon nga ang mga personnel sa Department of Engineering and Public Works nag-overlay og filling materials aron matubag ang lapok nga sitwasyon sa venue.

Ang mga materyal kay konkretong debris gikan sa giguba nga White Gold building sa General Maxilom Ave.

Matud ni Guardo, adunay dul-an sa 100 ka trak sa filling materials nga gamiton sa pagtabon sa lapok nga bahin.

“Dili man ta ka aspalto gyud basta mag-ulan, maanugon kay mabungkag ra ang aspalto, dili ka compact kaayo. Ang yuta sad lapok so, dili maayo ang compaction,” matud ni Guardo.

Bisan pa sa mga paglangay, si Guardo nipasalig nga mahuman ang tanang trabaho sa aspalto sa Huwebes, Enero 12.

Matud sa konsehal, dili siya makahatag og updates sa nagpadayong construction sa entablado ug amphitheater-type grandstand sanglit pribado nga construction company ang nagdumala niini.

Nangayo usab og pagsabot si Guardo sa publiko sanglit mao kini ang unang higayon nga ang Sinulog Festival ipahigayon sa SRP ug dili sa Cebu City Sports Center.

Ang desisyon nga ipahigayon ang kapistahan sa SRP sa unang higayon maoy usa ka paagi sa kagamhanan sa dakbayan sa pag-promote sa maong lugar alang sa umaabot nga investors, dugang niya.

“It will be a good venue for us to invite investors, it is the role of the LGU (local government unit) to create an activity to excite investors,” matud ni Guardo.

Dugang niya, naposisyon na ang SRP isip sunod nga investment hub sa siyudad, ilabi na sa padayong pagtukod og convention center ug sports arena nga maoy labing dako sa Visayas ug Mindanao region. (IRT)