ANG mga magtutudlo sa dakbayan sa Talisay mihimo na og lakang aron sugdan na ang pagpahigayon sa face-to-face classes.

Si Talisay City Mayor Gerald Anthony "Samsam" Gullas sa pakighinabi sa mga sakop sa media niadtong adlaw nga Biyernes, Hunyo 17, 2022, nibutyag nga iyang gisuportahan ang maong lakang sa mga magtutudlo.

Tungod niini naglaraw ang mayor nga makigtagbo sa Local School Board sa unang semana sa Hulyo sa iyang paglingkod pagbalik isip amahan sa dakbayan.

"The government will repair all of these (schools) using the Special Education Fund (SEF), mao nga akong gihangyo ang schools division superintendent nga ipatawag ang tanang mga principal aron pangutan-on unsay problema nila, amend their previous request nga pre-Odette to a post-Odette rehabilitation request," sigun sa mayor.

Dugang ni Gullas nga ang Department og Education (DepEd) Talisay City Division dunay mga nagkadaiyang priority projects sa wala pa ang bagyo'ng Odette apan ang mayor miingon ngadto nila nga kinahanglan i-amendar pa sa Local School Board ang SEF budget aron mohaom sa rehabilitasyon nga pagahimoon human sa pag-igo sa bagyong Odette.

Ang pipila sa mga nakompleto na og repair sa Engineering Department sa Talisay City government mao ang Lawaan 1 Elementary School ingon man ang roofing ug installation sa canopy sa Lawaan 3 National High School.

Sa habig usab ni Police Lieutenant Colonel Randy Caballes, hepe sa kapulisan sa dakbayan, siya nagkanayon nga duna na sila'y close coordination sa school heads ug nihimo na sab sila og inspection sa mga tunghaan.

"Ang atoa is more on security, atong i-secure lalo na kon magtapok na ang mga bata, mga ginikanan mag-abot sa opening mag-deploy ta og mga personnel for security unya ni-coordinate sad natu ang City of Talisay - Traffic Operations and Development Authority (CT-TODA) ilabi na katong mga eskwelahan along the highway ma-secure natu ang traffic flow sad," matud sa hepe.

Dugang ni Caballes nga duna ray ikasarang ang gidaghanon sa iyang mga sakop sa pagpatuman sa kahapsay ug kalinaw sa siyudad. (BBT, TPT)