Makalahos ug makasuroy ang tanang Sugbuanon nga gikan sa mga dakbayan sa Sugbo, Mandaue ug Lapu-Lapu nga moduaw sa kalungsoran ug mga siyudad sa lalawigan sa Sugbo.

Kini maoy gipahibalo ni Cebu Governor Gwendolyn Garcia human nga walay ipatuman nga border control ang probinsya.

“We’ve seen that before, nag border control ta, mas dako ang kadaot sa ekonomiya. Yes rising ang cases. But kadtong under control ta mas daghan naglisod. We have to balance things. We have to weigh in,” matod ni Garcia.

Ang Probinsya sa Sugbo gipaubos sa heightened restrictions sa general community quarantine (GCQ) diin gitugot gihapon ang outdoor tourist attraction, apan kinahanglan nga kutob lang sa 30 porsiyento ang kapasidad sa venue.

Subay sa Executive Order (EI) 35 ni Garcia sa Agusto 2, 2021, way age restriction ang pagsuroy sa mga specialized market sa Department of Tourism (DOT) sama sa ‘staycation, apan motuman sa mga protocol sa DOT.

“No age restriction pag may staycation. You can go and check-in at the hotels and resorts sa Province properly issued with accreditation paper with DOT and certificate of compliance by the Province of Cebu,” matod ni Garcia.

Paseguro nga malikay sa Covid-19 , gikinahanglan nga magbutang og air purifier nga adunay hepa filter sa mga rooms nga gitanyag sa mga resort ug hotels.

Giawhag ni Garcia ang kadagkoan sa lalawigan sa Sugbo ug tourism officers nga estriktuhon ang pag-monitor sa mga hotel ug resort lakip na sa mga outdoor tourist destination nga nisubay sa EO 20-A ug EO 13 series of 2021 nga naglatid sa guidelines sa kalihokan sa turismo sa lalawigan. (ANV)