PATAY ang habalhabal driver human gipauwanag bala samtang namasahero kagahapon sa alas 9:15 sa buntag didto sa Sitio Dakit, Barangay Tubod lungsod sa Minglanilla.

Si Romeo Tarding, 51, minyo taga Barangay Cadulawan, Minglanilla, dead on arrival (DOA) human nakaangkog samad pinusilan sa iyang dughan.

Wa pa mahilhi sa kapulisan ang nag-inusarang suspek nga sakay sa kolor itom nga motorsiklo nagsul-ob og facemask helmet nga itom nga naka-sunglasses.

Si SPO4 Oliver Dacua sa Minglanilla Police nga nahinabi sa Superbalita nagkanayon nga ang biktima naghatud og pasahero sa lugar ug sa pagpauli niini gisundan siya sa nagmotorsiklo nga suspek unya gipusil diin naigo sa dughan.

Si Dacua miingon nga wa nila masuta kon unsay motibo sa krimen hinuon ang mga posiblidad nga kaaway sa biktima ang suspek kabahin sa ilang imbestigasyon. (GPL)