Nasikop sa mga sakop sa Parian Police Station sa Cebu City Police Office (CCPO) ang giilang hitman sa usa ka drug personality atol sa gilusad nga buy-bust sa Huwebes sa kaadlawon, Hunyo 8, 2023, sa Sitio Riverside, Barangay Lorega San Miguel, dakbayan sa Sugbo.

Ang suspek giila nga si Rodito Branzuela, alyas “Damol”, taga Sitio Palma, Brgy. San Roque, dakbayan sa Sugbo.

Nakuha sa kapulisan ang mga pinakete sa gituohang shabu nga mobalor og P68,000 ug kalibre .45 nga armas sa iyang posisyon.

Gipaubos pa sa imbestigasyon ang suspek nunot sa mga nakuha nga impormasyon nga siya hitman sa usa ka drug personality.

Matod ni Police Colonel Ireneo Dalogdog, hepe sa kapulisan sa dakbayan sa Sugbo, nga duna nay gipang tug-an ang suspek nga mga pangalan nga maoy iyang amo apan nagdumili lang una siya pag tug-an kon kinsa tungod kay nagpadayon pa sila sa ilang imbestigasyon.

“So this is another accomplishment sa atong unified strategy katong ginatawag nato’g Orap (Operation Run After Perpetrators). So daghan na tag mga nadakpan no nga mga involved sa shooting incident,” matod ni Dalogdog.

Dunay giangkon si Branzuela nga kaso sa pagpamusil sa dakbayan sa Sugbo nga gipaubos pa usab sa imbestigasyon.

Ning sunod-sunod nga pagka sikop sa mga nangangkon nga hitman makatabang kini sa pagpakunhod sa mga krimen sa dakbayan sa Sugbo, sigun ni Dalogdog.

Nagpasabot kini nga halos tanang mga kaso sa pagpamusil sa siyudad dunay kalambigitan sa ilegal nga drugas.