DIHANG temporaryo nga gisirad-an sa gobiyerno ang isla sa Boracay sa mga turista ug patigayon sugod niadtong Abril ning tuiga, usa si Ricardo Ratay sa mga naapektuhan isip usa ka drayber og coaster sa usa ka tour company.

Gikan sa Boracay, gibalhin ang 44 anyos nga amahan sa ilang kompaniya ngadto sa lalawigan sa Bohol diin daghan usab ang mga lugar suroyanan isip usa gihapon ka drayber og coaster.

Matod ni Jay Melasa, operations manager sa Southwest Tours (Boracay), Inc., ang gitrabahoan ni Ratay, nga kini maoy nasabutan nila sa Department of Labor and Employment (Dole) nga ibalhin og laing mga lugar ang apektadong mga trabahante sama ni Ratay.

Niadtong Septiyembre 3, 2018, nasukod ang pagkamatinuoron ni Ratay dihang nakakita siya og pitaka nga napuno sa daghang mga kwarta sud sa coaster nga iyang gigamit pagkuha ug pagsuroy sa ilang mga kliyente nga grupo sa mga Koryano.

Bisan sa kadako sa kwarta nga iyang nakit-an nga mokabat sa P200,000, wala masilaw si Ratay ug iya kining giuli sa tag-iya nga Koryano nga si Mark Dae Hyun, kinsa nibisita sa Bohol kuyog ang iyang asawa.

Asoy ni Ratay sa Superbalita Cebu nga dali niya gipahibawo si Daniel Pastrana, ang ilang fleet supervisor ug in-charge sa reservation, kinsa mao na ang ni-contact sa tag-iya sa kwarta.

Sigon ni Ratay nga dunay polisiya ang ilang kompaniya basta kon dunay makit-an nga butang nga nahabilin ang ilang mga bisita kinahanglan gyud kini nila nga iuli sa tag-iya.

Nakuha na sa langyaw ang kwarta sa samang adlaw ug gigakos, gilamano ug gipasalamatan si Ratay ug kaubang mga drayber ug nihatag og P1,000 isip pahalipay nga gipalit ra usab ni Ratay og snacks ug gisaw-an nilang mga drayber.

Kagahapon sa buntag, si Ratay gipasidunggan ni Land Transportation Franchising and Regulatory Board (LTFRB) 7 Director Eduardo Montealto Jr., pinaagi sa gitunol nga Certificate of Commendation sa regional office.

“Nagpasalamat ako na binigyan ako ng award na hindi kayang bilhin kahit anong bagay lalo na sa Southwest Tours,” pamulong ni Ratay human nidawat sa award ug nidasig sa iyang kaubang mga drayber nga magpabiling matinuoron ug matinahuron sa ilang mga pasahero labi na sa mga turista aron padayong magbalikbalik.

Si Montealto mapasigarbuhon sa dalaygong gibuhat ni Ratay nga iyang panghinaut panaminan usab sa ubang mga drayber.

“Nga dinhi diay sa atong region daghan ang honest, nga bisan tuod og medyo dunay kalisod, kaya nilang buhaton ang tanan labi na gyud ang mga turista nga nia kadaghanan nga ilahang kliyente,” pamulong sa LTFRB 7 director.

Si Ratay, minyo, may usa ka anak ug lumad nga taga Aklan apan temporaryo nga nagpuyo sa Panglao, Bohol, nagpasalamat usab sa Ginuo sa ikaduhang kinabuhi nga iyang nadawat human siya nasakit sa miaging tuig diin nameligro ang iyang kinabuhi apan nahiuli ang iyang maayong panglawas. SCG