PATAY ang usa ka traysikad drayber nga nalumos sa kadagatan sa pier area sa Brgy. Poblacion, Dalaguete, Cebu niadtong Huwebes sa kaadlawon.

Giila ang biktima nga si Eufracio Orozco Caballero, 48, minyo, ug residente sa Sitio Cambangyao, Poblacion.

Base sa taho nga hubog ni si Caballero nga nagmaneho sa iyang traysikad ug kalit lang milahos sa dagat sa pier ug diha na nakadawat ug alarma ang kapulisan mga alas 11:00 sa gabii sa Mayo 16.

Daling mirespondi ang kapulisan giubanan sa Municipal Disaster Risk Reduction Management Office (MDRRMO) apan taudtaud nianang orasa nagkataas ang sug sa dagat ug gi-undang kadali ang operasyon. Nibalik sila mga alas 5:00 sa buntag ug nitabang na sa pagpangita ang igsuon sa biktima nga si Lucio Caballero ug mga alas 5:30 sa buntag nakit.an gyud sa ilawom nga bahin sa dagat si Caballero ug wala nay kinabuhi. (Carla Jane Calotes, CNU Comm Intern)