“KON ganahan ka mokuha og something, kuhaa gyud. If you dream, either dream big or don’t dream at all.”

Kini ang tambag ni Eleanore Duterte, ig-agaw ni Presidente Rodrigo Duterte, nga dili makalimtan sa iyang kamanghuran nga anak nga si Provincial Board Member-elect Andrei “Red” Duterte sa dihang buhi pa.

Si Eleanore, nidagan pagka mayor sa siyudad sa Danao apan napildi sa iyang ig-agaw nga si reelected Mayor Ramon “Nito” Durano III sa miaging piniliay niadtong Mayo 13.

Ang inahan ni Nito nga si Beatriz igsuon sa amahan ni Eleanore. Ang 70 anyos nga ginang namatay niadtong Hunyo 4 gumikan sa multiple organ failure sa usa ka pribadong ospital sa siyudad sa Mandaue.

Gibutyag ni Red nga gipaabot nila nga moduaw sa haya ang Presidente o ang mga miyembro sa unang pamilya human niya napahibawo pinaagi sa pag-text ang iyang ig-agaw nga si reelected Davao City Mayor Sara Duterte-Carpio. (SCG)