Nakaangkon og mga bali sa kabukogan ug mga samad sa lawas ang 26-anyos nga Chinese national nga niambak gikan sa ikatulong andana sa condo unit nga gipuy-an sa 2375 Guibilondo St., Barangay Mabolo, siyudad sa Sugbo kagahapon, Mayo 12, alas 2:30 sa hapon.

Si Police Sr. Master Sergeant Enrique Manulong sa Mabolo Police Station 4 nagkanayon nga nga nakadawat sila og tawag bahin sa usa ka tawo nga niambak sa building sa naasoyng dapit ug naabtan sa kapulisan nga buhi pa kini.

Ang biktima mao si Bang (di tinuod nga ngan), giingong wa sa maayong panghuna-huna.

Dali siyang gidala sa usa ka tambalanan ug gikatahong luwas na ang iyang kahimtang atol ning pagsuwat bisan pa sa iyang nahiaguman.

Sa pagkakaron, wala pa masayri sa kapulisan ang hinungdan sa pag-ambak samtang nagpadayon ang imbestigasiyon lakip sa pagkuha sa background sa batan-ong Intsek.

Matod ni Manulong, bisan ang manager sa building nga si Hen Hu nakurat usab sa hitabo sa pag-ambak ni Bang sa building.

Ang 26 anyos nga Tsino anaa pa karon sa tambalanan nagpaalim sa iyang mga angol sa kalawasan nunot na sa paglayat niini.