WAY mahitabong Ironman race sa dakbayan sa Sugbo karong tuiga human nihukom si Mayor Tomas Osmeña nga di paagian sa mga atleta ang South Road Properties diin nilagbas ang Cebu South Coastal Road.

Ang mayor nagkanayon nga adunay daghang mga reklamo nga iyang nadawat gumikan sa kahuot sa dagan sa mga sakyanan base sa nangaging mga Ironman, usa ka lumba sa triathlon.

“Regretfully, no Ironman this year...I like the Ironman. But which comes first? So many people are complaining about the traffic. People have undergone so much agony... I said next year, anytime, no problem. But right now, sirado pa ang N. Bacalso intawon,” pasabot ni Osmeña.

Ang Ironman ipahigayon sa Agusto diin ang mga organizer andam na sa ilang bulohaton ug nakigtambayayong na usab sa ubang mga local government unit.

Si Konsehal Joel Garganera niingon nga nakasabot sila nga makamugna kini og kahuot sa trapiko hinungdan nga giduso sa mga organiser nga ang karsada lang sa SRP nga paingon sa Plaza Independencia ang gamiton ug himuong two way paingon ngadto sa Talisay ang gamiton.

Iyang gipasabot nga mahatagan ra gihapon unta og solusyon sanglit ang problema mao ra ang mga bus nga mopaingon sa Cebu City.

Iyang gihulagway nga di dako ang mahimo nga kahasol sa trapiko sanglit sayo kini sa buntag sugdan ug maatol sa Dominggo diin minus ang mga sakyanan.

PR ni Tomas

Gihulagway ni Garganera nga nagpakaron-ingnon si Osmeña nga nagpakabana sa problema sa trapiko sa siyudad apan sa sinugdanan siya ang nagmugna og kahuot sa dalan. (PAC)