Usa ka information technology (IT) specialist ug tag-iya og machine shop nga si Gepind Requierme ang nagtinguha nga mahimong bise-mayor sa Dakbayan sa Mandaue human kini ni-file sa iyang certificate of candidacy (COC) niadtong Oktubre 1, 2021.

Ang Commission on Elections (Comelec) sa Dakbayan sa Mandaue nag-post sa ilang Facebook page nga si Requierme mao ang labing unang ni-file og COC isip independente sa dakbayan.

Sa pakighinabi sa Superbalita Cebu, miingon si Requierme nga nagtinguha siya nga modagan pagka bise-mayor sa dakbayan human giagni siya sa iyang mga higala sa politika.

Ang mga higala nga nag-agni niya mao silang former senator Antonio Trillanes ug City of Naga Mayor Kristine Vanessa Chiong.

Ang duha ka personalidad nag-awhag niya nga modagan isip mayor apan alang kaniya medyo taas kini nga posisyon, hinungdan nga midagan kini pagka bise mayor.

Si Requierme nagpuyo sa A.S. Fortuna St., Barangay Banilad, Dakbayan sa Mandaue sa wala pa siya mobalhin sa Barangay Casili, Dakbayan sa Mandaue nga bag-o lang niya gipuy-an.

Unom ka tuig na nga nagpuyo sa Dakbayan sa Mandaue si Requierme ug alang kaniya, igo na kini nga panahon nga masuta kon unsa ang kinahanglan sa komunidad.

Giasoy ni Requierme nga daghan siya og mga plano alang sa Dakbayan sa Mandaue ug alang niya nga daghan siya og ikatampo sa natad sa imprastraktura tungod nag-eskwela siya og Bachelor of Science sa Mechanical Engineering.

Gisultihan usab niya ang Superbalita Cebu nga siya moamot sab sa paglambo sa industrial sector sa Dakbayan sa Mandaue ug magdala og daghan pang investors.

Gawas niini, giingon niya nga maghimo unya siya og mga programa o mga kalihokan alang sa mga kabatan-onan tungod kay pagtuo niya nga sila ang kaugmaon sa dakbayan.

Sa pagkahuman sa pag-file sa iyang COC, miingon si Requierme nga gitrabaho na niya karon ang iyang mga materyal sa pagpangampanya aron mas mailhan siya ug mahibalo ang mga residente sa iyang katuyoan sa iyang pagdagan sa eleksiyon sa Mayo 2022. (KFD)