HUMAN sa nasinati nga pag-uwan sa Sugbo gipahibaw karon sa Metropolitan Cebu Water District (MCWD) nga wala na sa kritikal nga lebel ang Jaclupan facility sa Dakbayan sa Talisay.

Matod sa tigpamaba sa MCWD nga si Charmaine Rodriguez-Kara, nga anaa na sa 17,000 matag cubic meters ang ma-suplay sa maong pasilidad matag adlaw.

Dugang niini nga nagkaanam-anam og saka ang suplay sa Jaclupan gikan sa 10,000 cubic meter, niabot na kini karon sa 17,000 cubic meter.

Malaumon usab ang maong water facility nga magpadayon ang pagsaka sa suplay sa tubig sa maong pasilidad diin anaa sa 33,000 cubic meter, ang normal nga lebel niini.

Mapasalamaton usab ang MCWD sa pag-ampo nga gihimo sa simbahan niadtong Oratio Imperata sa pag-uwan ang gipagawas niini niadtong grabe ang problema sa tubig sa Sugbo.

Nagpabilin nga wala pa magamit ang Buhisan Dam sa Barangay Buhisan, Dakbayan sa Sugbo nga makasuplay unta kini og 7,000 cubic meter, matag adlaw. (HBL/Superbalita Cebu)