NABULABOG ang hinanok nga pagkatulog sa duha ka babaye tungod sa kawatan nga nakasulod sa ilang panimalay sa usa ka subdivision sa Barangay Tulay, Minglanilla, Cebu.

Nahitabo kini alas 3 sa kaadlawon sa Dominggo, Marso 8, 2020. Nailhan ang kawatan kay natangtang ang maskara niini sa dihang gilayog siya sa usa sa mga babaye, matod ni MSgt. Junel Ater sa Minglanilla Police Station.

Ang mga babaye nag-edad og 50 ug 52. Ang kawatan nailhan nga si Willy Estonimos, 40, kinsa silingan ra diay nila.

Gataptap si Estonimos nga pina-ninja sa iyang pagsulod sa panimay sa duha ka babaye.

Nakamata sila tungod sa kasikas ug ilang nakit-an ang kawatan.

Imbes nga mahadlok, gilayog sa duha ka babaye ang kawatan nga maoy hinungdan nga natangtang ang taptap niini sa nawong. Nakamay-on sila kay silingan ra diay nila.

Apan nakadagan si Estonimos nga dala ang mga alahas ug duha ka selpon, apan nabilin ang iyang gihimong maskara. Moabot sa P30,000 ang balor sa mga butang nga gikawat niini.

Mga alas 5 sa buntag, nadakpan sa Minglanilla police si Estonimos.

Matod ni Ater, gipakita sa pulis ngadto ni Estonimos ang taptap nga nabilin sa balay sa duha ka babaye ug giangkon niya nga iyaha kini.

Mga kaso nga pagpanglungkab ug physical injury ang atubangon ni Estonimos, matod ni Ater. (B)