Lima ka balay nangaugdaw samtang tulo ang nakan-an sa sunog nga niigo sa Sityo Kitchen, Brgy. Pajo, Siyudad sa Lapu-Lapu alas 11:42 sa udto sa Dominggo, Oktubre 8, 2023.

Sa interview sa Superbalita Cebu kang FO3 Jeffrey Gerodiaz, fire investigator sa Lapu-Lapu City Fire Dept., nasuta nga ang kayo nagsugod sa balay nga iya ni Nida Roa, 52, dalaga, may kapuyo.

Si Roa didto sa likod sa iyang balay nanglaba ug sa kalit lang niulbo ang sunog sa ikaduhang andana sa iyang balay.

Gumikan sa kasikit sa mga balay, dali rang nikatap ang kayo.

Way naangol sa sunog nga giisa sa first alarm.

Nagpadayon pa ang imbestigasyon sa hinungdan sa sunog nga nibilin og P105,000 nga danyos. / DVG