HINUNANGAN, So. Leyte - Presidente sa Association of Barangay Councils (ABC) ning lungsod sa nasikop sa gipahigayon nga anti illegal drugs operation sa Philippine Drug Enforcement Agency (PDEA) ug kapulisan sa Lunes sa alas 5:35 sa hapon, Marso 1, 2021.

Giila ang suspek nga si Romeo Ochea Saturinas, 57, minyo, taga Barangay Pondol ning lungsod.

Matod sa mga awtoridad, nalista isip high value target si Saturinas gumikan sa iyang kalambigitan sa ilegal nga drugas bisan sa iyang pagka opisyal sa lungsod.

Ang buy- bust gilusad sa karsada nga sakop sa Barangay Canipaan ning lungsod.

Matod sa kapulisan, usa ka nagpailang mamalitay ang nakigtransaksyon kang Saturias.

Napalitan og usa ka medium size nga pakete nga gituhoang shabu si Saturinas nga balor og P20,000. Nagpaila dayon ang mga awtoridad ug gianunsyo ang pagdakop kaniya.

Human sa buy-bust, gikapkapan dayon si Saturinas atubangan sa mga opisyal sa barangay ug media.

Nakuha gikan sa iyang posesyon ang laing tulo ka pakete sa gituhoang shabu. (JKDP)